Kok dikaji kaji bana, banyak sudah pangajaran dari urang urang daulu ka nan mudo mudo. Nan kaji tatulih sudah, tingga di kito nan mudo man...
Namun sayang bana, banyak pituah atau pasan pasan tantang baa manjalani iduik ko jarang tatulih di buku. Kitab nyo tu ndak ado do. Hanyo di sampaikan dari muncuang ka muncuang sae.
Samantaro itu, nan anak anak kini ko agak manangah urusan danga mandanga ko. Sakadarnyo kini ado pituah nan ambo tulih jo kontribusikan ka blog anakminang.com ko.
[post_ads]
Tujuanyo kok mungkin lai tabaco bisa diambiak palajaran. Kok untuang lai ka sampai juo awet, sabab ambo sangaik ma apresiasi admin kito ko. Mangumpuan sado nan dapek.
Langsuang sajo, ko nyo pituah nan babantuak pantun ko sanak:
Indak batanggang ba habih minyak
Dak nyo bak siang ba habih hari
Namuah batanyo rajin manyimak
Kalau baraja jo sapanuah hati
Maknanyo mangurangi karajo nan sio sio. Lalai, pamaleh bamanjo manjo. Rajin manyimak jo baraja jo ati nan iklas.
Jikok bakato di bawah-bawah
Kok nyo manyauk di ilia-ilia
Indak nyo suko mahajan tuah
Bakato sopan indak manggisia
Artinyo sifat rendah hati. Kato lain singkeknyo ndak tinggi ruok dari boto. Indak manggadang, sombong bahaso sederhananyo.
Pandai manggantang aie lauik
Pandai manyalam dalam bumi
Tau di rantiang ka manyangkuik
Pandai mangaji baso jo basi
Tau di rantiang ka mancucuak
Tau di dahan ka ma nimpo
Tau di ratak sabalun lapuak
Bujang arih rang bijak sano
Maknanyo mangarati jo kondisi. Tau ma nan ka mahambek, maa nan ka jadi rintangan. Pandai maukua keadaan.
Indak mangecek ba hati kusuik
Muko nan janiah di nampakkan
Walau harimau di dalam paruik
Kambiang juo nan di kaluakan
Maknanyo yo baramah ramah. Kalaupun mangurok bana hati mancaliak lawan mangicek, atau ndak suko jo urang yo bisa bisa lah sakironyo tatap ma utamokan sifat jo sikap nan ramah.
Bujang minang si bujang ramah
Tak dangki jo tinggi hati
Galak manih kucindan murah
Di sayang urang sanagari
Maknanyo masih saputaran baa kito basikap. Ramah, indak tinggi ati atau sombong. Supayo sayang dan sanang urang mancaliak parangai awak.
Pandai ma uleh rumin putuih
Tau di bayang kato tibo
Tinggi taratik jo mujilih
Paga adaik benteng pusako
Iko maknanyo baa supayo peka. Labiah bana kalau dalam diskusi diskusi. Mungkin ado nan mahasiswa, yo katiko manyampaikan pandapek dalam rapek jo bataratik.
Hati lapang paham tak sampik
Pandai manimbang jo manaka
Walau batenggang di nan rumik
Indak bakisa di nan bana
Maknanyo baapun kondisi kito tatap bapacik ka nan bana.
Di nan dalam tak bagalombang
Di nan dangka nyo tak bariak
Di sakik hiduik indak tagamang
Ka nan Kuaso inyo mamintak
Untuak nan iko baa supayo kito tabah jo saba manjalani iduik. Mental jo sikap nan kareh manjalani kehidupan.
Kalau baragiah jo mambari
Indak maharok baleh jaso
Jariah nan indak di kanalai
Bia nan satu manilai nyo
Intinyo ikhlas dalam manolong, baragiah ka urang lain.
Iman nyo taguah bapandirian
Ba istiqamah ba tauhid pulo
Dek kawan-kawan jadi panutan
Rang kampuang sayang kasadoannyo
Jikok bakato indak manyingguang
Kok bapambari jo randah hati
Jadi panutan dek urang kampuang
Sumarak urang sa nagari
Alah tatuah di ranah minang
Bujang minang rang bijaksano
Manyingguang urang inyo bapantang
Apo lai gadang nan ka malendo
[post_ads_2]
Arati nyo ikolah urang nan dicari masyarakat. Hablun minannas jo hablunminnallah nan rancak.
Indak barajo ka hati surang
Ba sutan ka mato inyo tido
Kayo katampek rang batenggang
Cadiak ka bakeh rang batanyo
Ibaraik baringin di tangah padang
Uraik tahujam ka palito
Aka nyo kuaik baurek tunggang
Panuah lah bumi dek rumpun nyo
Bapucuak cewang ka udaro
Tinggi manggapai awan biru
Kok urek nyo tampek baselo
Jadi pidoman musafia lalu
Sungguah batang tinggi manjulang
Tapi tinggi nyo manaungi
Dahan nan rampak ka bagantuang
Jikalau paneh ka payuang panji
Tapakai dalam pergaulan masyarakaik. Manjadi urang nan diparetongan dek lingkungan. Berkontribusi dalam kehidupan bahaso kerennyo.
Dek gampo indak taruntuahkan
Takkan nyo tumbang dek limbubu
Dek badai indak ta olengkan
Kononlah lah goyang angin lalu
Jadilah urang nan ba prinsip. Bapandirian taguah. Tantunyo taguah di nan bana.
Samantaro sagitu nan takumpuakan dek ambo baru sanak. Lain wakatu lain kesempatan ado jodoh ambo kirim baliak tulisan tulisan ka blog anakminang.com ko. Untuang lai bamanfaat untuak sanak.
Kontribusi: Bujang Malayu
Agiah Komen Gai La Sanak