Kumpulan Pantun Minang Sansai di Rantau

Bajalan jauah bajalan Rantau urang nan den hadang Mungkin alah takadia badan Bansaiak di awak kayo di urang. Rantau urang nan den h...

Bajalan jauah bajalan
Rantau urang nan den hadang
Mungkin alah takadia badan
Bansaiak di awak kayo di urang.

Rantau urang nan den hadang
Mambao tulang nan lapan karek
Harok nasib bak cando urang
Tapi kini apo nan denai dapek

Mambao tulang nan lapan karek
Dima tumbuah sinan disiang
Ibaraik badan pambungkuih lapek
Lapek tabukak badan tabuang

Dima tumbuah sinan disiang
Kok lai namuah juo lado babuah
Indak manyasa badan tabuang
Untuang kok lai nasib barubah

Kok lai namuah lado babuah
Den bao ka balai di hari sanjo
Bialah padiah untuang ko susah
Insyaallah lai indak baputuih aso

Ka balai denai di hari sanjo
Mamakai baju cabiak di badan
Suok kida usaho di cubo
Lantunkan juo doa ka Tuhan

Baju cabiak pakaian badan
Sarawa lusuah tampak di mato
Oh mande tolong ampunkan
Denai alun mambaleh guno

Bia kini sarawa lusuah
Lado tajua den bali baru
Dikampuang mande usahlah rusuah
Basaba badan kok datang rindu